Tarix: 04 İyun 2024 09:29 | Baxış sayı: 506

Qadınların fəallığına kişilər mane olur - Qadınlar Şurasının sədri

“Diasporla Müsahibə”nin növbəti qonağı Qazaxıstanın Almatı şəhərində fəaliyyət göstərən Azərbaycanlı Qadınlar Şurasının sədri Ceyran Məmmədova olub.

C.Məmmədova müsahibəsində Qadınlar Şurasının fəaliyyətindən bəhs edib.

O, bildirib ki, Qazaxıstanda müxtəlif peşə sahəsində çalışan qadın soydaşlarımızın bir hissəsi Şurada fəaliyyət göstərir:

“Əvvəllər dövlət işində çalışırdım, 1 ildir təqaüdə çıxmışam. Koronavirus başlayandan sonra onlayn formada qruplar açıb fəaliyyət göstərdik. Sonra əyani görüşlər təşkil etdik, tədbirlər, yığıncaqlar keçirdik. Azərbaycanlı qadınların bir hissəsi aktivdir, bəziləri isə ailəli olduqları üçün həyat yoldaşları icazə vemir, yaxud da körpə uşaqları var deyə, fəallıq göstərə bilmirlər”.

C.Məmmədova əlavə edib ki, ara-sıra qadınları və uşaqları bir araya toplayır, Azərbaycan həqiqətlərindən, adət-ənənələrindən bəhs edir.

Müsahibimiz etiraf edib ki, qadınların və gənclərin fəallığına kişilər mane olur:

“Kişilər deyirlər ki, hər şeyi qadınların əlinə vermək olmaz, onları başlı -başına buraxsan hər şey edərlər. Belə zarafatlar da edirik. Etiraf edim ki, bəzən belə də olur. Kişilər nə qədər mane olsalar da biz yenə öz bildiyimizi edirik”.

C.Məmmədovanın sözlərinə görə, Diasporla İş üzrə Dövlət Komitəsi bəzi layihələrdə onlara dəstək olub:

“Bizə əvvəl dedilər ki, Komitə sizə dəstək olmayacaq, biz də müraciət etmədik. Sonra Komitədən adamlar gəldi, görüşdük. Hətta onların dəstəyi ilə avqust ayında Qazaxıstanda qadınlar konfransını keçirmək istəyirik. Konfransa Komitənin dəstəyi ilə bir neçə müğənni - incəsənət nümayəndələri çağırmaq planımız var”.

Şura sədrinin sözlərinə görə, gələcək üçün əsas planlarından biri də gənc qızlar və oğlanların birgə fəaliyyətinə şərait yaratmaqdır:

“Azərbaycanlı ailələri bir-birinə daha yaxından tanıtmaq, qohumluq əlaqələrini gücləndirmək istəyirik”.

Şərhlər

Mais Abuşlu

Çalışın kişiləri Hərşeydə günah keçisinə Döndərməyin...sonra peşman ola bilərsiniz...

08 İyun 2024 18:34

Ağamirzə Fətəliyev

Qadınların fəallığını məhdudlaşdırmasaq kişilərimiz qapaz yeyəcəklər. 100%

04 İyun 2024 19:53

Yaz...